سری نگر:بھارتیہ جنتا پارٹی(بی جے پی) کی بھارتی حکومت نے بھارت کے غیر قانونی زیر قبضہ جموں وکشمیر کے خطے لداخ سے تعلق رکھنے والے معروف ماحولیاتی کارکن سونم وانگچک کی غیر قانونی حراست کو فوری طور پر ختم کرنے کا فیصلہ کیا ہے۔
وانگچک اس بھارتی ریاست راجستھان کی جودھ پور جیل میں قید ہیں ۔ انہیں گزشتہ برس 26 ستمبر کو لداخ کے ضلع لیہہ میں مطالبات کے حق میں شدید احتجاجی مظاہروں کے دوران کالے قانون نیشنل سیکورٹی ایکٹ (این ایس اے) کے تحت حراست میں لیا گیا تھا۔ بھارتی فورسز کیطرف سے مظاہرین پر اندھا دھند فائرنگ کے نتیجے میں چار افراد کی جانیں چلی گئی تھیں۔
بھارت نے وانگچک پرلوگوں کو اکسانے اور مظاہرے بھڑکانے کا الزام عائد کیا تھا۔ بھارتی وزارت داخلہ نے آج وانگچک کی نظربندی منسوخ کرنے کا اعلان کیا۔لداخ کو چھٹے شیڈول میں شامل کرنے ، علاقے کو ریاست کا درجہ دینے اور دیگر مطالبات کیلئے جدوجہد کرنے والی تنظیموں کرگل ڈیموکریٹک الائنس (کے ڈی اے) اور لیہہ اپیکس باڈی (ایل اے بی ) مسلسل وانگچک کی رہائی کا مطالبہ کر رہی تھیں۔